Культурніцкая прастора "Даліна Анёлаў"

Былы «Мозырдрэў», раней – запалкавая фабрыка «Маланка», яшчэ раней – у 18 стагоддзі – манастыр цыстэрцыянаў ці “белых манахаў”, рэдкага манаскага ордэну, які захаваўся (хоць не ў Беларусі) і дагэтуль. Муры манастыра, а таксама грунтоўныя падземныя скляпенні на амаль паўтара гектарах плошчы захаваліся таксама, праўда, схаваныя яны пад тынкоўкай ды пад тонамі пяску. Манастыр і пазнейшыя пабудовы атачаюць узгоркі, дзе месцілася ў час ранняга сярэднявечча старажытнае гарадзішча Мазыра. 

Між узгоркаў – яна. Тапанімічна – Даліна Анёлаў з аднога боку, з другога – Ценевая даліна.
Адно і другое гучыць так прыгожа, што прынялася агульная назва «Даліна».

Зрэшты, у Мазыры няма іншай Даліны, памыліцца немагчыма. Як няма ў Мазыры і зычлівай для ўсіх і кожнага арт-прасторы з кавярнямі, мастацкімі галерэямі, майстэрнямі рамеснікаў і артыстаў, канцэртнымі і танцавальнымі пляцоўкамі, кіна- і лекцыйнымі заламі, дзе вітаецца ўсё, акрамя фармалізму і фальшу. 
Мы хочам, каб такая арт-прастора з'явілася. Крок за крокам, цэгла за цэглай, пакой за пакоем – мы робім усё, на што здольныя, каб аднавіць манастыр і ўратаваць усё, што мае культурную каштоўнасць, і што можна яшчэ ўратаваць. І надаць яму статус «пад аховай». 

А вось у невыразныя, затое прасторныя будынкі савецкай эпохі мы марым усяліць дух свабоднай творчасці і запрашаем туды ўсіх, каму гэты дух блізкі. Чамусьці мы верым, што калі Даліна ажыве ўсімі сваймі пляцоўкамі і сцяжынкамі – людзям у Мазыры, Калінкавічах і наваколлі стане весялей і цікавей жыць. Бо ў хвіліну «прухі» можна будзе прымчацца ў рэпетыцыйную кропку і запісаць наваствораны рыф ці дабегчы да творчай майстэрні і накрэсліць зарыс будучага шэдэўра. Не трэба будзе ехаць па гэта за сямсот км. А ў хвіліну суму ці маркоты можна будзе сесці ля вакна ў арт-кавярні, слухаць ціхі джаз і глядзець на любімы горад, адчуваючы сябе ўтульна, свойска і ў той жа час рамантычна. 

У Літаратурнай гасцёўні Даліны першыя сустрэчы прайшлі з аншлагам. Нас аказалася шмат, і нам ёсць пра што размаўляць да поўначы і даўжэй. 

Таму Даліна паўстае крок за крокам. Мы там штодня, і каманда расце. Далучайцеся, смела прыходзьце, гэта прастора для кожнага, і мы будзем вельмі радыя вам.

Далучыцца i падтрымаць каманду неабыякавых людзей лёгка - заходзьце на сайт dalina.by  і ў групы ў сацыяльных сетках Далiна Анёлаў у Мазыры

Рэдакцыя MLife спадзяецца, што ў нашым грамадстве засталіся яшчэ людзі творчыя, гатовыя глядзець у будучыню з адкрытым сэрцам.

Мы ж будзем асвятляць усе навіны па "Далiне Анёлаў" як мага лепш, каб дапамагчы праекту.